ពុទ្ធសាសនាផ្សារភ្ជាប់នឹងសង្គម
ដោយ ទេព សុរ៉ាវី
2012-09-21
ក្នុងគោលបំណងបញ្ជ្រាបពុទ្ធឱវាទ ផ្សព្វផ្សាយនូវធម៌របស់ព្រះសម្មាសម្ពុទ្ធទៅដល់មហាជន ដើម្បីរួមចំណែកជួយអភិវឌ្ឍន៍ប្រទេសជាតិ ឲ្យជៀសផុតពីអបាយមុខផ្សេងៗ និងផ្ដល់ចំណេះដឹងទូទៅដល់ប្រជាពលរដ្ឋ រដ្ឋាភិបាលកម្ពុជា និងក្រសួងធម្មការ និងកិច្ចការសាសនា បានបង្កើតកម្មវិធី "នាទីពុទ្ធសាសនាផ្សារភ្ជាប់សង្គម"។កម្មវិធីនេះ បានផ្សព្វផ្សាយតាមវិទ្យុ និងទូរទស្សន៍ ទាំងរដ្ឋ និងឯកជន ដោយសង្ឃឹមថានឹងអាចទាក់ទាញចំណាប់អារម្មណ៍ប្រជាពលរដ្ឋ ឲ្យត្រងត្រាប់តាមពុទ្ធឱវាទ និងមានជីវភាពរស់នៅល្អនៅក្នុងសង្គម។
ពុទ្ធបរិស័ទជាច្រើន រួមមានលោកអាចារ្យ អាចារ្យរិនី យុវសិស្ស បានត្រងត្រាប់ និងលើកដៃប្រណម ផ្ទៀងស្ដាប់ព្រះសង្ឃទេសនាអប់រំចិត្ត ឲ្យប្រព្រឹត្តតែអំពើល្អ និងមានគុណធម៌។ ព្រះតេជព្រះគុណ ឈឹង ប៊ុនឈា មានថេរដីកាក្នុងនាទីពុទ្ធសាសនាផ្សារភ្ជាប់សង្គម បានទូន្មានទៅដល់ពុទ្ធបរិស័ទថា ប្រសិនបើគ្មានគុណធម៌ក្នុងខ្លួន រមែងធ្វើឲ្យមនុស្សរស់នៅមិនបានល្អ និងជួបតែរឿងក្ដៅក្រហាយ មិនចេះចប់មិនចេះហើយ។
ប្រធាននាយកដ្ឋានស្រាវជ្រាវផ្សព្វផ្សាយពុទ្ធសាសនាផ្សារភ្ជាប់ សង្គម នៃក្រសួងធម្មការ និងកិច្ចការ សាសនា លោក សាន សម្ផស្ស ឲ្យដឹងថា "គុណធម៌" គឺជាប្រធានបទមួយ ក្នុងចំណោមប្រធានបទជាង ៣០០ ដែលគាត់ និងសហការីបានតាក់តែង និងដាក់ប្រគេនឲ្យព្រះសង្ឃទេសនារួចមកហើយ ចាប់តាំងពីកម្មវិធីនេះចាប់ផ្ដើមពីឆ្នាំ២០០៩។
ប្រធានបទដែលជ្រើសរើស ត្រូវបានផ្សារភ្ជាប់ទៅនឹងស្ថានភាពសង្គមជាក់ស្ដែងនៅកម្ពុជា រួមមានការចៀសផុតពីបញ្ហាគ្រឿងញៀន ចៀសផុតពីបញ្ហាក្មេងទំនើង ឲ្យចៀសផុតពីការយល់ខុស ចៀសផុតពីការចាប់រំលោភផ្លូវភេទ និងអប់រំស្ត្រីមានគភ៌ឲ្យចេះរក្សាគភ៌ ឧស្សាហ៍ទៅពិនិត្យ ពិគ្រោះយោបល់ជាមួយគ្រូពេទ្យនៅមន្ទីរពេទ្យ ដើម្បីសុវត្ថិភាពមាតា និងទារក។
លោក សាន សម្ផស្ស លោកពន្យល់ថា ព្រះពុទ្ធសាសនាដើរតួនាទីសំខាន់នៅក្នុងសង្គម និងមិនអាចកាត់ផ្ដាច់បាន ទាំងក្នុងការទូន្មានពុទ្ធបរិស័ទ ឲ្យប្រព្រឹត្តតែអំពើល្អ និងអប់រំយុវជនដែលមានជាប់ពាក់ព័ន្ធបញ្ហាគ្រឿងញៀន ការប្រព្រឹត្តអំពើអសីលធម៌ និងមិនគោរពឱវាទឪពុកម្ដាយ ឬលោកគ្រូអ្នកគ្រូ ឲ្យងាកត្រឡប់មកប្រព្រឹត្តអំពើល្អ ស្គាល់ខុសត្រូវ និងចៀសផុតអំពើអបាយមុខផ្សេងៗ ដែលសង្គមស្អប់ខ្ពើម។
លោក សាន សម្ផស្ស៖ «ប្រទេសកម្ពុជា របស់យើង ជាប្រទេសមួយដែលប្រជាជនភាគច្រើនប្រកាន់គោរពព្រះពុទ្ធសាសនាដ៏លើស លប់។ ដើម្បីបញ្ជ្រាបនូវធម៌របស់សម្មាសម្ពុទ្ធទៅដល់មហាជន របត់នៃការប្រែប្រួលឥរិយាបថរបស់យុវជន យុវនារី ដែលខ្លះជាប់ដោយគ្រឿងញៀន ខ្លះក៏ឪពុកម្ដាយ ឬក៏លោកគ្រូអ្នកគ្រូស្ដីឲ្យមិនស្ដាប់ អ៊ីចឹងឃើញថាផ្លាស់ប្ដូរច្រើន»។
កម្មវិធីព្រះពុទ្ធសាសនាផ្សារភ្ជាប់នឹងសង្គម ស្ថិតក្រោមក្របខ័ណ្ឌរបស់រដ្ឋ ដែលមានគាំទ្រពីលោកនាយករដ្ឋមន្ត្រី ហ៊ុន សែន និងភរិយា និងមាននាទីអនុវត្តផ្ទាល់ដោយក្រសួងធម្មការ។
លោក សាន សម្ផស្ស បន្តថា កម្មវិធីនេះរៀបចំនិមន្តព្រះសង្ឃមកទេសនា ដោយមានពុទ្ធបរិស័ទ ចូលរួមស្ដាប់ និងកម្មវិធីស្មូតច្រៀង ដោយថតជាវីដេអូ និងសំឡេងទុកចាក់បន្តនៅតាមស្ថានីយទូរទស្សន៍ និងវិទ្យុ។ លោកបញ្ជាក់ថា ដោយមានកិច្ចសហការគ្នា មានស្ថានីយទូរទស្សន៍ និងវិទ្យុជាង ២០ស្ថានីយរួចមកហើយ ទាំងនៅរាជធានីភ្នំពេញ និងនៅតាមបណ្ដាខេត្តមួយចំនួន បានយល់ព្រមចាក់ផ្សាយកម្មវិធីនេះដោយឥតគិតថ្លៃ។
លោក សាន សម្ផស្ស៖ «យើងចង់រកម៉ោងណាល្អៗដែរ ដើម្បីបញ្ជ្រាបនូវពុទ្ធឱវាទរបស់ព្រះពុទ្ធសម្មាសម្ពុទ្ធ ដល់ប្រជាជនមហាជនរបស់ពួកយើង។ ទូរទស្សន៍គេទំនេរគេចាក់មួយវគ្គ ពីរវគ្គអ៊ីចឹងទៅ ដែលអង់គ្លេសគេហៅថា ពីរសូរ ឬ បីសូរ (2 show or 3 Show)»។
អគ្គនាយករងស្ថានីយទូរទស្សន៍ស៊ី.ធី.អិន (CTN) និងទូរទស្សន៍ស៊ី.អិន.ស៊ី (CNC) លោក សោម ឆាយា លោកប្រាប់ថា ស្ថានីយទូរទស្សន៍របស់គាត់មិនចង់ចំណេញ ឬរកចំណូលអ្វីពីនាទីព្រះពុទ្ធសាសនានោះទេ ក្រៅតែពីការជួយក្នុងន័យពង្រឹងវិស័យសាសនារបស់រដ្ឋ និងសង្គម ដោយមើលឃើញថា ការអប់រំតាមបែបព្រះពុទ្ធសាសនា វាជាផ្លូវមួយបែបទៀតសម្រាប់យុវជន ក៏ដូចជាពុទ្ធសាសនិកជនផ្សេងទៀតបានជ្រួតជ្រាប និងអនុវត្តតាមដំបូន្មានពុទ្ធឱវាទ។
លោក សោម ឆាយា៖ «យើងមើលឃើញថា វាជាការល្អ ដើម្បីបញ្ជ្រាបនូវព្រះពុទ្ធសាសនា ឲ្យប្រជាជនឲ្យកាន់តែខ្លាំងថែមទៀត វាជាសាសនារបស់រដ្ឋ ហើយក៏យើងត្រូវការឲ្យប្រជាជនរបស់យើងដែលជាអ្នកកាន់ព្រះពុទ្ធ សាសនា ឲ្យមានការយល់ដឹងរឿងព្រះពុទ្ធសាសនាឲ្យកាន់តែខ្លាំងថែមទៀត»។
កន្លងមក កម្មវិធីព្រះពុទ្ធសាសនា គេកម្រនឹងឃើញចាក់ផ្សាយតាមបណ្ដាញស្ថានីយទូរទស្សន៍ ឬវិទ្យុ ដោយកម្មវិធីនេះមិនសូវមានម្ចាស់ឧបត្ថម្ភ។ វាលែងតែស្ថានីយទូរទស្សន៍ និងវិទ្យុជាតិប៉ុណ្ណោះ ដែលចាក់ផ្សាយនៅពេលមានកម្មវិធីបុណ្យ ឬថ្ងៃសីលជាដើម។
ប៉ុន្តែបច្ចុប្បន្ន កម្មវិធីព្រះពុទ្ធសាសនាផ្សារភ្ជាប់សង្គម ប្រែជាផ្លាស់ប្ដូរទម្លាប់ចាក់ផ្សាយស្ទើររាល់ថ្ងៃ និងស្ទើរគ្រប់ស្ថានីយទូរទស្សន៍ និងវិទ្យុ។ ក្នុងនោះ ក៏មានស្ថានីយ និងវិទ្យុខ្លះទៀត បានបង្កើតកម្មវិធីព្រះពុទ្ធសាសនាដោយខ្លួនឯងតែម្ដង បន្ទាប់ពីមានការគាំទ្រពីពុទ្ធសាសនិកជន។
តែទោះជាយ៉ាងណា កម្មវិធីនាទីព្រះពុទ្ធសាសនាផ្សារភ្ជាប់នឹងការអប់រំ ត្រូវបានបង្កើតឡើងរៀងរាល់ថ្ងៃសីល ឬមានន័យថា មាន ៤ដងក្នុងមួយខែ។ ជួនកាលកម្មវិធីនេះ អាក់ខានថតខ្លះដែរ ទៅតាមពេលវេលា និងកាលៈទេសៈជាក់ស្ដែងរបស់អ្នកគ្រប់គ្រងកម្មវិធី។
ពុទ្ធបរិស័ទម្នាក់ឈ្មោះ មាស លី អាយុ ៧០ឆ្នាំ ដែលគាំទ្រនាទីនេះ បានពន្យល់ថា វាជានាទីមួយមានសារសំខាន់សម្រាប់អប់រំផ្លូវចិត្ត និងដំបូន្មានល្អៗពីពុទ្ធឱវាទ ដែលភ្ជាប់នឹងបញ្ហាគ្រឿងញៀន ស្រី ស្រា ល្បែងស៊ីសង និងក្រុមក្មេងទំនើង ដែលកំពុងកើតមានឡើងនៅក្នុងសង្គមខ្មែរ។ តែកម្មវិធីព្រះពុទ្ធសាសនានេះ វាហាក់ស្ថិតនៅឆ្ងាយពីចំណាប់អារម្មណ៍របស់យុវជន និងយុវតីនៅឡើយ។
លោក មាស លី៖ «ការអប់រំរបស់ក្រសួងអប់រំ លោកឲ្យបញ្ចូលនូវធម៌ព្រះពុទ្ធលើកដៃឡើងក្នុងដំបូងក្នុងថ្នាក់ទី១ ថា ខ្ញុំសូមមនសិការលើកហត្ថា បង្គំគុណទាំងបីរហូតអ៊ីចឹងទៅ យើងសំពះគ្រូឈរ អង្គុយចុះ គ្រូគាត់បញ្ជាឲ្យធ្វើតាមដំបូន្មានរបស់គ្រូអ៊ីចឹងទៅ ដូច្នេះសុភាពរាបសារហៅថា ចរិយាធម៌ និងសីលធម៌ វាកើតមានក្នុងការអប់រំរបស់ព្រះពុទ្ធសាសនានៅក្នុងអាណាចក្រ»។
លោក មាស លី បន្តថា ប្រសិនបើមានការដាក់បញ្ចូលនូវកម្មវិធីព្រះពុទ្ធសាសនានៅក្នុង កម្មវិធីអប់រំ ឲ្យបានច្រើន យុវជនអាចចេះផ្នែកអក្សរសាស្ត្រ សីលសាស្ត្រ និងវិទ្យាសាស្ត្រ តាមផ្នែកព្រះពុទ្ធសាសនា ដែលបណ្ដុះឲ្យមនុស្សមិនមានការឆ្គាំឆ្គង និងគ្មានទំនាស់ជាមួយអ្នកផងទាំងឡាយ។ ម្យ៉ាងវិញទៀត ធ្វើឲ្យយុវជនចាប់អារម្មណ៍វិស័យព្រះពុទ្ធសាសនា មានសុជីវធម៌ល្អ និងសង្គមរីកចម្រើន។
វិលទៅលោក សាន សម្ផស្ស ប្រធាននាយកដ្ឋានស្រាវជ្រាវផ្សព្វផ្សាយពុទ្ធសាសនាផ្សារភ្ជាប់សង្គម នៃក្រសួងធម្មការ និងកិច្ចការសាសនាវិញ លោកថា យុវជនគួរយកពេលវេលាត្រងត្រាប់ការអប់រំរបស់មាតាបិតា គ្រូ សាស្ត្រាចារ្យ និងគោរពការទូន្មានប្រៀនប្រដៅរបស់ព្រះពុទ្ធសាសនា ជាជាងការ យកពេលវេលា និងយកខ្លួនបៀតនឹងគ្រឿងញៀន និងប្រព្រឹត្តអំពើអបាយមុខផ្សេងៗ៕
No comments:
Post a Comment